في وسط الأحداث السياسية اللي بنعيشها، بيبقى دايمًا الرهان الحقيقي على وعي المواطن المصري، لأنه الأساس اللي بتتبني عليه كل إنجازات الدولة. والتاريخ دايمًا شاهد على مين اشتغل بضمير، وبذل كل جهده علشان يخدم وطنه.
الحمد لله، وبشهادة الواقع ودعمكم، ما قصّرناش في حق حد، ولا تأخرنا في خدمة بلدنا. قدرنا نكشف ملفات فساد كبيرة زي ملف القمح، واللي وفّر للدولة من 15 إلى 40 مليار جنيه كل سنة، من سنة 2016.
وكان شرف كبير ليا إنّي أكون أول نائب من أسيوط يتولى وكالة لجنة الخطة والموازنة، واستطعت من خلال ذلك المنصب أن أخدم وأدعم محافظتي بكافة أشكال الدعم في جميع القطاعات الخدمية والتنفيذية. وكان من أمثلة ذلك – وليس على سبيل الحصر – الحصول على الموافقات وتخصيص الميزانيات لفتح طرق جديدة، زي الطريق الصحراوي الشرقي مرورًا بالمعابدة، وزيادة دعم العلاج على نفقة الدولة، وزيادة دعم التعليم والصحة في أسيوط، وكمان حلّينا أزمة الأسمدة اللي كانت مأزقًا للفلاحين، لحد ما تم إنشاء فرع للشركة المصرية للأسمدة في أبنوب.
كمان طالبت بإدراج المواد اللي بيتصنع منها مخدر الشابو ضمن المواد المحظورة، حرصًا على شبابنا ومستقبلهم.
من أول يوم دخلت فيه البرلمان سنة 2005 كمستقل، وبعدها في 2015 و2020 مع حزب مستقبل وطن، كان دعمكم هو سر النجاح، وهو اللي خلّاني دايمًا عند حسن ظنكم.
شاء القدر إنّي أبتعد عن قبة البرلمان، بس والله ما بعدت عنكم ولا عن حبكم. محبتكم ودعمكم ليا هما الوسام اللي أعتز بيه طول عمري.
هفضل دايمًا في صفكم، وبخدمكم من أي موقع، لأن المنصب الحقيقي هو وجودي بينكم.
تحيا أبنوب، وتحيا أسيوط، وتحيا مصر تحت قيادة فخامة الرئيس عبدالفتاح السيسي.
كلنا بنشتغل علشان مصر، علشان مصر، علشان مصر وبس
النائب / ياسر عمر
عضو مجلس النواب
اليوم: الأحد الموافق 12 أكتوبر 2025