المقادير:
حوالي 5 او 6 معالق سمنة كبار
كوباية نشا كبيرة
بيضة
رشة ملح
معلقة صغيرة فانيليا
معلقة صغيرة بيكينج باودر
نصف كوباية زيت
كوباية ونصف سكر
مقدار الدقيق حوالي 3 كوبايات أو اكتر ع حسب ما العجينة تظبط معاكى يعني متبقاش مفرفته ولا تبقى طرية وماسكة نفسها
وفي الاخر هنضيف معلقة كبيرة كاكاو بس دي خلوها في الاخر خالص
طريقة التحضير:
- نحط السمنه في الطبق اللي هنعجن فيه ونضيف النشا والسكر والفانيليا و البيكينج بودر ورشة الملح ونقلب كويس لحد ما الخليط يبقى كريمي وبعدين نضيف الزيت والبيضة ونقلب كويس و بعدين نضيف الدقيق بالتدريج كده لحد ما العجينة تلم وتظبط معاكي.
- هنقسم العجين لنصفين قد بعض بالظبط وتحطي كل واحده لوحدها، واحدة هتحطى عليها معلقة الكاكاو علشان هتبقى هى الشوكولاتة والتانية هتحطي عليها معلقة دقيق علشان تبقى متساوية.
- نبدأ في تشكيل العجين ونعمل 3 كور صغيرة أبيض و3 كور صغيرة شوكولاتة ونلزقهم في بعض بحيث يكون لون ورا لون وبعدين كوريها واضغطي عليها.
- نخبزه في فرن مسخن مسبقاً على درجة حرارة 180 لمدة 10 - 15 دقيقة بدون تشغيل الشواية ممكن نشغل المروحة بس